अथ श्रीवेदनिधितीर्थस्तोत्रम् विद्याधीशकराब्जोत्थं सत्यव्रतमहागुरुम् । जितकामादिषड्वर्गं नौमि वेदनिधिं विदे ॥ १ ॥ पदव्याख्याननिष्णातं सर्वविद्याविशारदम् । वादिमत्तेभपारीन्द्रं नौमि वेदनिधिं विदे ॥ २ ॥ रङ्गनाथयतीन्द्रेण सेवितं कामितार्थदम् । सत्यानन्दगुरुं शान्तं नौमि वेदनिधिं विदे ॥ ३ ॥ राघवेन्द्रयतेर्मित्रं सत्यधर्मप्रपालकम् । धर्माभासस्य शास्तारं नौमि वेदनिधिं विदे ॥ ४ ॥ मूलरामपदासक्तं पञ्चव्यासप्रपूजकम् । पूज्यदिग्जयरामेतं नौमि वेदनिधिं विदे ॥ ५ ॥ पाण्डुरङ्गपुरावासं पाण्डुरङ्गपदार्चकम् । पाण्डुरङ्गप्रसादाढ्यं नौमि वेदनिधिं विदे ॥ ६ ॥ भीमानदीतटागारं भीमशास्त्रोपदेशकम् । भीमसंसारसन्तारं नौमि वेदनिधिं विदे ॥ ७ ॥ सत्यध्यानयतीशेड्यं सत्यध्यानपरायणम् । सत्यध्यानप्रदातारं नौमि वेदनिधिं विदे ॥ ८ ॥ सत्यात्मरचितं स्तोत्रं श्रीवेदनिधिगोचरम् । यः पठेच्छृणुयाद्वापि स सर्वाभीष्टभाग्भवेत् ॥ ९ ॥ ॥ इति श्रीवेदनिधितीर्थस्तोत्रम् ॥