अथ यन्त्रोद्धारकहनूमत्स्तोत्रम् नमामि दूतं रामस्य सुखदं च सुरद्रुमम् । पीनवृत्तमहाबाहुं सर्वशत्रुनिवारणम् ॥ १ ॥ नानारत्नसमायुक्तकुण्डलादिविराजितम् । सर्वदाऽभीष्टदातारं सतां वै दृढमाहवे ॥ २ ॥ वासिनं चक्रतीर्थस्य दक्षिणस्थगिरौ सदा । तुङ्गाम्भोधितरङ्गस्य वातेन परिशोभिते ॥ ३ ॥ नानादेशागतैः सद्भिः सेव्यमानं नृपोत्तमैः । धूपदीपादिनैवेद्यैः पञ्चखाद्यैः स्वशक्तितः ॥ ४ ॥ व्रजामि श्रीहनूमन्तं हेमकान्तिसमप्रभम् । व्यासतीर्थयतीन्द्रेण पूजितं च विधानतः ॥ ५ ॥ त्रिवारं यः पठेन्नित्यं स्तोत्रं भक्त्या द्विजोत्तमः । वाञ्छितं लभतेऽभीष्टं षण्मासाभ्यन्तरे खलु ॥ ६ ॥ पुत्रार्थी लभते पुत्रं यशोऽर्थी लभते यशः । विद्यार्थी लभते विद्यां धनार्थी लभते धनम् ॥ ७ ॥ सर्वथा माऽस्तु सन्देहो हरिः साक्षी जगत्पतिः । यः करोत्यत्र सन्देहं स याति नरकं ध्रुवम् ॥ ८ ॥ ॥ इति श्रीव्यासराजविरचितं यन्त्रोद्धारकहनूमत्स्तोत्रम् ॥