अथ श्रीवादिराजस्तोत्रम् चन्द्रार्ककोटिलावण्य लक्ष्मीशकरुणालयम् । वन्दिताङ्घ्रियुगं सद्भिः वादिराजं नतोऽस्म्यहम् ॥ १ ॥ इन्द्रादिदेवताराध्य मध्वसद्वंशमादरात् । वन्दिताङ्घ्रियुगं सद्भिः वादिराजं नतोऽस्म्यहम् ॥ २ ॥ श्रीहयास्यार्चनरतं साधुवेदार्थबोधकम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ३ ॥ दुर्वादिमत्तद्विरदकण्ठीरवमहर्निशम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ४ ॥ सर्वकामप्रदं श्रीमद्विजेन्द्रकुलशेखरम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ५ ॥ मन्त्रक्रमविचारज्ञं तन्त्रशास्त्रप्रवर्तकम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ६ ॥ ज्ञानादिगुणसम्पन्नमशेषाघहरं शुभम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ७ ॥ प्रदक्षिणीकृतभुवं त्वक्षमालाधरं विभुम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ८ ॥ विचित्रमुकुटोपेत मचिन्त्याद्भुतदर्शनम् । वन्दिताङ्घ्रियुगं सद्भिः वादिराजं नतोऽस्म्यहम् ॥ ९ ॥ पुरतो व्यासदेवस्य निवसन्तं महाद्युतिम् । वन्दिताङ्घ्रियुगं सद्भिः वादिराजं नतोऽस्म्यहम् ॥ १० ॥ ॥ इति वादिराजस्तोत्रम् ॥