अथ दशावतारस्तुतिः
प्रोष्ठीशविग्रह, सु-निष्ठीवनो
द्धतवि-शिष्टाम्बुचारिजलधे ।
कोष्ठान्तराहितवि-चेष्टागमौ
घ परमेष्ठीडित त्वमव माम् ॥ १ ॥
प्रेष्ठार्कसूनुमनु-चेष्टार्थमा
त्मविद-तीष्टो युगान्तसमये ।
स्थेष्ठात्मशृङ्गधृत-काष्ठाम्बुवा
हन, व-राष्टापदप्रभतनो ॥ २ ॥
खण्डीभवद्बहुल-डिण्डीरजृ
म्भणसु-चण्डीकृतोदधिमहा- ।
काण्डातिचित्रगति-शौण्डाद्य है
मरदभाण्डाप्रमेयचरित ॥ ३ ॥
चण्डाश्वकण्ठमद-शुण्डालदु
र्हृदय-गण्डाभिखण्डकरदो- ।
श्चण्डामरेश हय-तुण्डाकृते
दृशमखण्डामलं प्रदिश मे ॥ ४ ॥
कूर्माकृते त्ववतु नर्मात्मपृ
ष्ठधृत-भर्मात्ममन्दरगिरे ।
धर्मावलम्बन सु-धर्मासदा
कलितशर्मा सुधावितरणात् ॥ ५ ॥
दुर्मानराहुमुखदुर्मायिदा
नवसु-मर्माभिभेदनपटो ।
घर्मार्ककान्तिवर-वर्मा भवा
न् भुवन-निर्माणधूतविकृतिः ॥ ६ ॥
धन्वन्तरेऽङ्गरुचि-धन्वन्तरेऽ
रितरु-धन्वंस्तरीभव सुधा- ।
भान्वन्तरावसथ, मन्वन्तरा
धिकृत-तन्वन्तरौषधनिधे ॥ ७ ॥
दन्वन्तरङ्गशुगु-दन्वन्तमा
जिषु वि- तन्वन् ममाब्धितनया ।
सून्वन्तकात्महृद-तन्वन्तरा
वयव-तन्वन्तरार्तिजलधौ ॥ ८ ॥
या क्षीरवार्धिमथ-नाक्षीणद
र्पदिति-जाक्षोभितामरगणा ।
पेक्षाप्तयेऽजनि, व-लक्षांशुबि
म्बजिदतीक्ष्णालकावृतमुखी ॥ ९ ॥
सूक्ष्मावलग्नवस-नाऽऽक्षेपकृ
त्कुचक-टाक्षाक्षमीकृतमनो- ।
दीक्षासुराहृत-सुधाऽक्षाणि नोऽ
वतु, सुरूक्षेक्षणाद्धरितनुः ॥ १० ॥
शीक्षादियुङ्गिगम-दीक्षासुल
क्षण - परीक्षाक्षमा विधिसती ।
दाक्षायणी क्षमति, साक्षाद्रमाऽ
पि न य - दाक्षेपवीक्षणविधौ ॥ ११ ॥
प्रेक्षाक्षिलोभकरलाक्षारसो
क्षित-पदाक्षेपलक्षितधरा ।
साऽक्षारितात्मतनु-भूक्षारका
रिनिटि लाक्षाऽक्षमानवतु नः ॥ १२ ॥
नीलाम्बुदाभ शुभ-शीलाद्रिदे
हधर, खेलाहृतोदधिधुनी - ।
शैलादियुक्तनिखि-लेलाकटा
द्यसुरतूलाटवीदहन ते ॥ १३ ॥
कोलाकृते जलधि-कालाचला
वयव नीलाब्जदंष्ट्रधरणी- ।
लीलास्पदोरुतल-मूलाशियो
गिवर - जालाभिवन्दित नमः ॥ १४ ॥
दम्भोलितीक्ष्णनख-सम्भेदिते
न्द्ररिपु- कुम्भीन्द्र पाहि कृपया ।
स्तम्भार्भकासहन, डिम्भाय द
त्तवर गम्भीरनादनृहरे ॥ १५ ॥
अम्भोधिजानुसर-णाम्भोजभू
पवन-कुम्भीनसेशखगरा ।
ट्- कुम्भीन्द्रकृत्तिधर-जम्भारिष
ण्मुख-मुखाम्भोरुहाभिनु माम् ॥ १६ ॥
पिङ्गाक्षविक्रम-तुरङ्गादिसै
न्यचतु-रङ्गावलिप्तदनुजा ।
साङ्गाध्वरस्थबलि-साङ्गावपा
तहृषि-ताङ्गामरालिनुत ते ॥ १७ ॥
शृङ्गारपादनख-तुङ्गाग्रभि
न्नकन-काङ्गाण्डपातितटिनी ।
तुङ्गातिमङ्गल-तरङ्गाभिभू
तभज - काङ्गाघ वामन नमः ॥ १८ ॥
ध्यानार्हवामनत-नो नाथ पा
हियज मानासुरेशवसुधा- ।
दानाय याचनिक, लीनार्थवा
ग्वशितनानासदस्यदनुज ॥ १९ ॥
मीनाङ्कनिर्मल-निशानाथको
टि-लसमानात्ममौञ्जिगुणका- ।
पीनाच्छसूत्रपद-यानातप
त्रकर-कानम्यदण्डवरभृत् ॥ २० ॥
धैर्याम्बुधे परशु-चर्याधिकृ
त्तखल-वर्यावनीश्वर महा- ।
शौर्याभिभूत कृत-वीर्यात्मजा
तभुज - वीर्यावलेपनिकर ॥ २१ ॥
भार्यापराधकुपि-तार्याज्ञया
गलित-नार्यात्मसूगलतरो ।
कार्याऽपराधमवि-चार्यार्यमौ
घजयि वीर्यामिता मयि दया ॥ २२ ॥
श्रीराम लक्ष्मणशु-कारामभू
रवतु गौरामलामितमहो- ।
हारामरस्तुतयशो रामका
न्तिसुत - नो रामलब्धकलह ॥ २३ ॥
स्वारामवर्यरिपु-वीरामय
र्द्धिकर, चीरामलावृतकटे ।
स्वारामदर्शनज-मारामया
गतसु-घोरामनोरथहर ॥ २४ ॥
श्रीकेशव प्रदिश नाकेशजा
तकपि-लोकेशभग्नरविभू- ।
स्तोकेतरार्तिहर-णाकेवला
र्थसुख-धीकेकिकालजलद ॥ २५ ॥
साकेतनाथ वर-पाकेरमु
ख्यसुत-कोकेन भक्तिमतुलां ।
राकेन्दुबिम्बमुख, काकेक्षणा
पह हृषीकेश तेऽङ्घ्रिकमले ॥ २६ ॥
रामे नृणां हृदभिरामे, नरा
शिकुलभीमे, मनोऽद्य रमतां ।
गोमेदिनीजयित-पोऽमेयगा
धिसुत-कामे निविष्टमनसि ॥ २७ ॥
श्यामे सदा त्वयि जितामेयता
पसजरामे गताधिकसमे ।
भीमेशचापदल-नामेयशौ
र्यजित वामेक्षणे विजयिनि ॥ २८ ॥
कान्तारगेहखल-कान्तारट
द्वदन-कान्तालकान्तकशरं ।
कान्ताऽऽर याम्बुजनि-कान्तान्ववा
यविधु -कान्ताश्मभाधिप हरे ॥ २९ ॥
कान्तालिलोलदल-कान्ताभिशो
भितिल - कान्ता भवन्तमनु सा ।
कान्तानुयानजित-कान्तारदु
र्गकट - कान्ता रमा त्ववतु माम् ॥ ३० ॥
दान्तं दशानन-सुतान्तं धरा
मधि - वसन्तं प्रचण्डतपसा ।
क्लान्तं समेत्य विपि-नान्तं त्ववा
प यम-नन्तं तपस्विपटलम् ॥ ३१ ॥
यान्तं भवारतिभ-यान्तं ममा
शु भगवन्तं भरेण भजता ।
त् स्वान्तं सवारिदनु-जान्तं धरा
धरनिशान्तं, सतापसवरम् ॥ ३२ ॥
शंपाभचापलव-कम्पास्तश
त्रुबल-सम्पादितामितयशाः ।
शं पादतामरस-सम्पातिनोऽ
लमनु-कम्पारसेन दिश मे ॥ ३३ ॥
सम्पातिपक्षिसह जं पापरा
वणहतं पावनं यदकृथा- ।
स्त्वं पापकूपपति-तं पाहि मां
तदपि, पम्पासरस्तटचर ॥ ३४ ॥
लोलाक्ष्यपेक्षित-सुलीलाकुर
ङ्गवध-खेलाकुतूहलगते ।
स्वालापभूमिजनि-बालापहा
र्यनुज - पालाद्य भो जय जय ॥ ३५ ॥
बालाग्निदग्धपुर-शालानिला
त्मजनि- फालात्तपत्तलरजो ।
नीलाङ्गदादिकपि-मालाकृता
लिपथ-मूलाभ्यतीतजलधे ॥ ३६ ॥
तूणीरकार्मुक-कृपाणीकिणा
ङ्कभुज-पाणी रविप्रतिमभाः ।
क्षोणीधरालिनिभ-घोणीमुखा
दिघन-वेणीसुरक्षणकरः ॥ ३७ ॥
शोणीभवन्नयन-कोणीजिता
म्बुनिधि-पाणीरितार्हणिमणि- ।
श्रेणीवृताङ्घ्रिरिह वाणीशसू
नुवर-वाणीस्तुतो विजयते ॥ ३८ ॥
हुङ्कारपूर्वमथ-टङ्कारना
दमति-पङ्काऽवधार्यचलिता ।
लङ्का शिलोच्चय-विशङ्का पत
द्भिदुर शङ्काऽऽस यस्य धनुषः ॥ ३९ ॥
लङ्काधिपोऽमनुत यं कालरा
त्रिमिव शङ्काशताकुलधिया ।
तं कालदण्डशत-सङ्काशका
र्मुक - शराङ्कान्वितं भज हरिम् ॥ ४० ॥
धीमानमेयतनु-धामाऽऽर्तम
ङ्गलद-नामा रमाकमलभू- ।
कामारिपन्नगप-कामाहिवै
रिगुरु- सोमादिवन्द्यमहिमा ॥ ४१ ॥
स्थेमादिनाऽपगतसीमाऽवता
त् सखल सामाजरावणरिपू ।
रामाभिधो हरिर - भौमाकृतिः
प्रतनसामादिवेदविषयः ॥ ४२ ॥
दोषाऽऽत्मभूवशतु-राषाडति
क्रमजरोषात्मभर्तृवचसा ।
पाषाणभूतमुनि-योषावरा
त्मतनु-वेषादिदायिचरणः ॥ ४३ ॥
नैषादयोषिदशु-भेषाकृद
ण्डजनि-दोषाचरादिशुभदो ।
दोषाऽग्रजन्ममृति-शोषापहोऽ
वतु सु-दोषाङ्घ्रिजातनात् ॥ ४४ ॥
वृन्दावनस्थपशु-वृन्दावनं
विनुतवृन्दारकैकशरणं ।
नन्दात्मजं निहत-निन्दाकृदा
सुरज-नं दामबद्धजठरम् ॥ ४५ ॥
वन्दामहे वयम-मन्दावदा
तरुचि-मन्दाक्षकारिवदनं ।
कुन्दालिदन्तमुत कन्दासित
प्रभत-नुं दावराक्षसहरम् ॥ ४६ ॥
गोपालकोत्सवकृ-तापारभ
क्ष्यरस-सूपान्नलोपकुपिता- ।
शापालयापितल-यापाम्बुदा
लिसलि-लापायधारितगिरे ॥ ४७ ॥
स्वापाङ्गदर्शनज-तापाङ्गरा
गयुत-गोपाङ्गनांशुकहृति- ।
व्यापारशौण्ड विवि-धापायत
स्त्वमव, गोपारिजातहरण ॥ ४८ ॥
कंसादिकासदव-तंसावनी
पतिवि-हिंसाकृतात्मजनुषं ।
संसारभूतमिह-संसारब
द्धमनसं सारचित्सुखतनुम् ॥ ४९ ॥
संसाधयन्तमनि-शं सात्विक
व्रजम-हं सादरं बत भजे ।
हंसादितापसरि-रंसास्पदं
परमहंसादिवन्द्यचरणम् ॥ ५० ॥
राजीवनेत्र विदु- राजीव मा
मवतु राजीवकेतनवशं ।
वाजीभपत्तिनृप-राजीरथा
न्वितज-राजीवगर्वशमन ॥ ५१ ॥
वाजीशवाहसित-वाजीशदै
त्यतनु-वाजीशभेदकरदो- ।
जजीकदम्बनव-राजीवमु
ख्यसुम-राजीसुवासितशिरः ॥ ५२ ॥
कालीहृदावसथ-कालीयकु
ण्डलिप-कालीस्थपादनखरा ।
व्यालीनवांशुकर-वालीगणा
रुणित - कालीरुचे जय जय ॥ ५३ ॥
केलीलवापहृत-कालीशद
त्तवर-नालीकदृप्तदितिभू- ।
चूलीकगोपमहि-लालीतनू
घुसृण-धूलीकणाङ्कहृदय ॥ ५४ ॥
कृष्णादिपाण्डुसुत-कृष्णामनः
प्रचुर-तृष्णासुतृप्तिकरवा ।
क् कृष्णाङ्कपालिरत, कृष्णाभिधा
घहर, कृष्णादिषण्महिल भोः ॥ ५५ ॥
पुष्णातु मामजित, निष्णातवा
र्धिमुद - नुष्णांशुमण्डल हरे ।
जिष्णो गिरीन्द्रधर - विष्णो वृषा
वरज, धृष्णो भवान् करुणया ॥ ५६ ॥
रामाशिरोमणिधरामासमे
तबल - रामानुजाभिध रतिं ।
व्योमासुरान्तकरते मारता
त दिशमे माधवाङ्घ्रिकमले ॥ ५७ ॥
कामार्तभौमपुर-रामावलि
प्रणय-वामाक्षिपीततनुभा ।
भीमाहिनाथमुख-वैमानिका
भिनुत, भीमाभिवन्द्यचरण ॥ ५८ ॥
सक्ष्वेलभक्ष्यभय-दाक्षिश्रवो
गणज-लाक्षेपपाशयमनं ।
लाक्षागृहज्वलन-रक्षोहिडि
म्बबक - भैक्षान्नपूर्वविपदः ॥ ५९ ॥
अक्षानुबन्धभव-रुक्षाक्षर
श्रवणसाक्षान्महिष्यवमती ।
कक्षानुयानमध-मक्ष्मापसे
वनम-भीक्ष्णापहासमसताम् ॥ ६० ॥
चक्षाण एव निज पक्षाग्रभू
दशश-ताक्षात्मजादिसुहृदा ।
म् आक्षेपकारिकुनृ-पाक्षौहिणी
शतबलाक्षोभदीक्षितमनाः ॥ ६१ ॥
तार्क्ष्यसिचापशर-तीक्ष्णारिपू
र्वनिज - लक्ष्माणि चाप्यगणय ।
न् वृक्षालयध्वज-रिरक्षाकरो
जयति, लक्ष्मीपतिर्यदुपतिः ॥ ६२ ॥
बुद्धावतार कवि - बद्धानुक
म्प कुरु, बद्धाञ्जलौ मयि दयां ।
शौद्धोदनिप्रमुख-सैध्दान्तिका
सुगम-बौद्धागमप्रणयन ॥ ६३ ॥
क्रुद्धाहितासुहृति-सिद्धासिखे
टघर, शुद्धाश्वयान कमला- ।
शुद्धान्त मां रुचिपि नद्धाखिला
ङ्गनिज-मद्धाऽव कल्क्यभिध भोः ॥ ६४ ॥
सारङ्गकृत्तिधर-सारङ्गवा
रिधर, सारङ्गराजवरदा- ।
सारं गदारितरसारं गता
त्ममद - सारं गतौषधबलम् ॥ ६५ ॥
सारङ्गवत्कुसुम-सारं गतं
च तव, सारङ्गमाङ्घ्रियुगलं ।
सारङ्गवर्णमप-सारङ्गता
ब्जमद - सारं गदिंस्त्वमव माम् ॥ ६६ ॥
ग्रीवास्यवाहतनु-देवाण्डजा
दिदश भावाभिरामचरितं ।
भावातिभव्यशुभ-धीवादिरा
जयति-भूवाग्विलासनिलयम् ॥ ६७ ॥
श्रीवागधीशमुख-देवाभिन
म्यहरि सेवार्चनेषु पठता- ।
मावास एव भविताऽवाग्भवे
तरसु-रावासलोकनिकरे ॥ ६८ ॥
॥ इति श्रीवादिराजतीर्थविरचिता दशावतारस्तुतिः ॥